بڵاوکردنەوەی ڤیدیۆی ئاهەنگ نایاساییە1
ئەگەر داوای وێنەیەک لە خانمێک بکەیت تەواو کۆتایی بە دونیا دێت. پێت دەڵێت:
– چۆن شتی وا دەبێت؟ حەرامە! جوان نییە! خەڵک چیمان پێ دەڵێت؟ بڵاو دەبێتەوە! باوکم دەمکوژێت! ئامۆزاکانم دێنە سەرم. بۆ تۆ من بە کێ تێگەیشتوویت؟ تۆ دەزانیت من کچی کێم؟
ئەو وەڵامانە تا ڕادەیەکی زۆر ڕاستن. بەڵام لە ئاهەنگێکی هاوسەرگیریدا پڕهۆڵێک ژن بە تەنوورەی کورت و عەزیی بێقۆڵ و سنگڕووت و دوامۆدەوە چوار کاژێر هەڵدپەڕن. دوو سێ کوڕی بێگانەش بە کامێرای ڤیدیۆ وێنەیان دەگرن. سبەی ئەم ڤیدیۆی ئاهەنگە دەخرێتە سەر سیدی و ماڵەوماڵ دەگێڕرێت. دوکانی ڤیدیۆکەش بە سیدی دەیفرۆشێتەوە.
ڤیدیۆی ئاهەنگ بە بەرچاوی دونیاوە نمایش دەکرێت
بۆ نموونە لە سەهۆڵەکە لەسەر عەرەبانەی سیدی بە بەر چاوی ئەم هەموو خەڵکەی ئەوێدا ڤیدیۆی ئاهەنگ نمایش دەکرێت. خەڵکان دەوەستن و بە دەم گوڵەبەڕۆژەخواردنەوە تەماشای ئەم هەموو کچ و ژنانە دەکەن.
کەسێک جگە لە من نییە بڵێت: ئەم دیاردەیە نایاساییە و نابێت ڤیدیۆی ئاهەنگی تایبەتیی خەڵک بفرۆشرێتەوە؟ یان نابێت ڤیدیۆی ئاهەنگی تایبەتی لە بەر چاوی خەڵکانی تردا نمایش بکرێت؟
ئێستا بۆچی لای خەڵک داواکردنی وێنەیەک حەرامە، کەچی بڵاوکردنەوەی ڤیدیۆی ئاهەنگ حەڵاڵە؟
دژی نیم، بەڵام خۆم بە دوور دەگرم
من خۆم زۆر بە دوور دەگرم لە شوێنی قەرەباڵغ و داخراو و پڕ لە دەنگی بەرز، کە بۆ نەگبەتی پرسەخانە و هۆڵەکانی ئاهەنگ هەردووکیان وان. گەر بچم بۆ هەر شوێنێکی هاوشێوە تا ماوەیەکی زۆر دوور و درێژ لەرەلەری دەنگی بڵندگۆ زیادکراوەکان لە مێشکمدا دەزرنگێتەوە و دەگرمێتەوە. بە جۆرێک کاس دەبم کە تەواو ماندووم دەکات و پێویستم بە پشووێکی زۆر درێژی بێدەنگی دەبێت تا دێمەوە دۆخی هێوری.
ئەڵبەت بە هیچ شێوەیەک دژی ئەو بۆنانە نیم، بەڵکو پێم وایە کە لە جێبەجێکردنی نەریتەکەدا چەند هەڵەیەک هەن کە دەبێت دەستنیشان بکرێن و چاک بکرێن. بە هیچ شێوەیەک دژی تەڕپۆشی و جوانپۆشیش نیم، بگرە پێم خۆشە هەموو کەسێک تەڕپۆش بێت. بە پێچەوانەی ئیسلامییەکانەوە، هیچ سنوورێکیشم نییە بۆ چۆنێتیی تەڕپۆشی.
چارەکێکیان تێدایە!
چەند برادەرێکم هەن پێش ئەوەی بچنە ئاهەنگی هاوسەرگیرییەوە چارەکێک ویسکی دەخۆنەوە. جارێک لە یەکێکیانم پرسی:
– بۆچی پێش ئەوەی بچیتە نێو ئاهەنگەوە مەی دەخۆیتەوە؟
وتی:
– بۆ ئەوەی شتم پێ عەیب نەبێت!
ئەم وەڵامە زۆر سەیر بوو لام. جا ئەگەر بەو پێودانگە بێت کە پیاوەکان لە بەرکوڵدا چارەکێک دەخۆنەوە، ئەی ژنەکان؟ کەواتە یان ئەوانیش دەخۆنەوە، یان هەر لە لەدایکبوونەوە چارەکێک ویسکییان تێدایە!
ئەوەی کە سەیرترە ئەوەیە کە زۆرێک لەو خانمە بەڕێزانە لە ژیانی ڕۆژانەیاندا حیجابپۆشن. بەڵام کە دواندوومن، دەڵێن: «نا، ئەو ڕۆژە بۆنەیە!».
بەهەرحاڵ، پێم وایە دوکانداری ڤیدیۆ مافی فرۆشتنەوە و بڵاوکردنەوەی ڤیدیۆی ئاهەنگی خەڵکی نییە. تەنانەت ئەگەر بووک و زاواکەش ڕێ بدەن هەر نابێت، چون خەڵکی تری تێدایە کە لەوانەیە پێی خۆش نەبێت ڤیدیۆی بڵاو ببێتەوە.
- لە ١ی ئابی ٢٠١٣دا نووسیومە. لە ٢٢ی ئەیلوولی ٢٠٢١، ٢٨ی شوباتی ٢٠٢٥دا پیایدا چوومەتەوە. ↩︎
